Тошкент шаҳрида талончилик билан шуғулланиб келган жиноий гуруҳ қўлга олинди. Бу ҳақда “Огоҳ” нашри ёзмоқда.

Яшнобод туман прокуратураси терговчиси Ҳусейн Насировнинг берган маълумотларига қараганда, 5 кишидан иборат гуруҳнинг барча аъзолари муқаддам судланган бўлиб, улар турли хонадонларни кузатиб юришган ва у ерга ўғриликка тушишган. Бунда уй эгаларига нисбатан зўравонлик ишлатиб, ҳаётларига хавф солишган.

Гуруҳ раҳбари, 1970 йили Тошкент вилоятида туғилган Асилбек Валиев 1995 йилда судланиб, бир йилдан сўнг амнистия асосида қамоқдан чиққан. Шундан сўнг у ўз атрофига Нурмат Сиддиқов (1963), Садир Тошматов (1972), Абдумўмин Пардаев (1960) ва Анвар Отахоновни (1959) тўплаб, жиноий гуруҳ тузган.

Биринчи сафар гуруҳ Юқоричирчиқ тумани Бордонкўл ҚФЙда яшовчи Н. Раҳимов хонадонига бостириб кириб, 20 млн сўмлик буюмлар ва нақд пулларни олиб чиқиб кетишган.
Орадан бир муддат ўтиб, гуруҳ Яшнобод тумани Мўйноқ кўчасида жойлашган корхоналардан бирига кириб, у ердан сейфдаги 4 млн, қоплар ичидаги 50 млн сўм пулни ўғирлаб кетишган.
Жиноий гуруҳ аъзоларига тегишлича жазо чоралари кўрилди.