2011 йилдан бери фуқаролик уруши кетаётган Суриянинг президенти Башар Асад баъзи ғарб давлатлари, Туркия, Саудия Арабистони ва Қатарни террорчиларга қурол-аслаҳа ва турли анжомлар етказиб беришда айблади, деб хабар бермоқда РИА “Новости” ахборот агентлиги.

“Агар сиз ҳақиқатан террорчилар билан курашишни ва уларни ютишни истасангиз, унда уларга Саудия Арабистони ва Қатар кўмагида асосан Туркия орқали қурол-аслаҳа, пуллар ва ёлланма жангарилар етказиб берилишининг олдини олишингиз керак”, деб айтди Асад Чехия телевидениесига берган интервьюсида.

Асаднинг айтишича, бу террорчиларга қарши курашдаги биринчи қадам бўлади.

“Акс ҳолда сиз улар билан курашаверасиз, улар бўлса турли, авваламбор минтақадаги давлатлардан Ғарбнинг, аниқроғи улардан баъзиларининг кўмаги ёки кўзини юмиши ёрдамида чекланмаган миқдорда қурол-аслаҳа, зарурий анжомлар, пуллар олаверадилар”, деб айтди Асад.

Асад навбатдаги марта Россия Сурия қўшинларини қўллаб-қувватловчи ҳарбий операцияни бошлагандан кейингина унинг давлатида вазият яхшилана бошлагани ҳақидаги фикрни айтди.