Британиялик 68 ёшли пенсионер Дерик Уайт Apple компаниясига қарши судда ғолиб чиқди. Компания дўкони ходимлари ҳеч қандай огоҳлантиришларсиз унинг телефонидаги барча маълумотларни ўчириб ташлаган. Бу ҳақда Evening Standard газетаси хабар бермоқда.

The Sun нашрининг изоҳ беришича, қурилмада 15 йил давомида ёзиб борилган телефон рақамлари бўлган. Фотосуратлар, айниқса, Уайт учун жуда қадрли эди. Телефонда эркак учун муҳим хотиралар жамланган бўлиб, бунга тошбақанинг унинг қўлидан тишлаб олгани видеосини, Африка сафарисига бўлган саёҳат фотосуратларини мисол қилиш мумкин.

Уайт суддан 5 минг фунт стерлинг миқдоридаги моддий зарар талаб қилди. У бу пулларга рафиқаси билан яна бир асал ойини ўтказишга қарор қилган эди. Чунки рафиқаси бўлган воқеани эшитиб йиғлаб юборган ва қаттиқ сиқилган.

30 ноябрь куни суд қариянинг талабини қондирди, аммо тўлиқ ҳажмда эмас. Моддий зарар миқдори 1200 фунтни ташкил этди, шунингдек, Apple қариянинг 800 фунтдан иборат юридик харажатини ҳам қоплаб берган.