Сўнгги пайтларда минтақанинг турли ҳудудларида зилзилалар содир бўлди. Биргина шу ойнинг ўзидаёқ бир неча бор ер силкиниши кузатилди. Бу ҳолат ҳеч кимни бефарқ қолдирмади. Ҳатто яқинда кучлироқ зилзила содир бўлиши мумкинлиги ҳақида хавотирли мишмишлар тарқалди.

Шуларга аниқлик киритиш мақсадида “Оила даврасида” газетаси Ўзбекистон Фанлар академияси Сейсмология институти илмий ходими, физика-математика фанлари номзоди Улфат Нурматовга мурожаат қилди.

“Ўзбекистон сейсмик фаол ҳудудлар сирасига киргани, тектоник жараёнлар мунтазам бўлиб туриши боис бу табиий ҳол, - деди мутахассис. – Аслида магнитудаси 3-5 га тенг зилзила ҳар ҳафта 5-6 марталаб қайд этилиши ҳам мумкин. Унинг кучи кам бўлгани учун зилзила одамларга сезилмайди. Лекин яқинда, аниқроғи, жорий йилнинг 26 октябрь куни рўй берган ер қимирлаши бироз кучлироқ бўлди. Бунинг сабаби зилзила ўчоғи ҳисобланган Афғонистонда у ниҳоятда чуқур эди. Зилзила ўчоғи қанчалик тубда бўлса, у атрофга шунчалик кенг тарқалади. Агар юзада бўлса, таъсири камроқ билинади”.

“Ҳозир қаерда, қандай кучдаги ер силкиниши рўй бериши ҳақида етарлича маълумот бор. Бу пухта ўрганилган, - сўзида давом этди Нурматов. – Унга кўра, республикадаги ҳудудлар сейсмик туманлаштирилади. Бундан ташқари, ҳукуматнинг тегишли қарорига мувофиқ, аҳолиси 5 минг кишидан ортиқ бўлган пунктларни ҳам сейсмик микротуманлаштириш масаласи устида иш олиб борилмоқда. Бу ўша ҳудудда қурилиш ишларини неча балли зилзилага бардошли қилиш лозимлигига амалий қўлланма сифатида ёрдам беради. Қайсидир жой 4, 5 ёки 6 баллга мослаштирилади”.

Шунингдек, у Ўзбекистонда мумкин бўлган энг кучли зилзила магнитудаси 6.5 баллдан ошмаслигини таъкидлаб ўтди: “Илмий хулосаларга кўра, Ўзбекистонда бўлиши мумкин максимал зилзила кучи Рихтер шкаласи бўйича 9 (6,5 баллга тенг)дан ошмайди. Чунки биздаги сейсмик ҳудудларнинг салоҳияти у қадар юқори эмас. Помир, Тян-Шань тоғларига туташ ҳудудларда зилзила магнитудаси 7 га етиши мумкин”.