АҚШ президенти Барак Обама маъмурияти Россия ва Туркия ўртасидаги ихтилофда дастлаб Анқара Су-24 самолётини уриб тушириш учун асосга эга бўлганлиги ҳақида баёнот берган бўлса ҳам, шундан буён ушбу масалада нейтралликни сақламоқда, деб ёзади Foreign Policy журнали.

Мақола муаллифининг фикрича, Оқ Уй Россиянинг ҳам, Туркиянинг ҳам жиғига тегишни истамаяпти. Сурия ихтилофига чек қўйишда АҚШга Россиянинг ёрдами зарур, шу боис Обама Москвани очиқчасига танқид остига олишдан қочмоқда. Туркия эса НАТО аъзоси ҳамда АҚШнинг минтақадаги энг муҳим иттифочисидир, шунинг учун Вашингтон Анқаранинг берган версиясини қўллаб-қувватлади.

“Обама ўрталиқда туришга уринмоқда, НАТОнинг ўзини мудофаа қилиш ҳақидаги версиясини қўллагани билан, воқеа дипломатик саъй-ҳаракатларга путур етказмаслигига куч сарфламоқда”, - деди Миллий манфаатлар маркази эксперти Эндрю Боуэн.