Instagram ижтимоий тармоғи ўтаётган йилга якун ясади. Ижтимоий тармоқ шу муносабат билан тузган ҳисоботида энг машҳур фотосуратлар, шаҳарлар, диққатга сазовор жойлар, хэштег ва эмодзиларни келтирди.

Instagram’да энг кўп лайклар олган сурат Ким Кардашьяннинг синглиси Кендалл Женнер сурати бўлди. Ушбу сурат 3,2 млн дан кўпроқ “юракча” олди. Шунингдек, энг машҳур суратлар бешталигига Тейлор Свифтнинг аккаунтидан иккита сурат ҳам кирди.

Энг машҳур шаҳар Нью-Йорк бўлди, Москва Париж ва Лондондан кейин 4-ўринни эгаллади. Диққатга сазовор жойлар орасида Эйфел минораси, Лувр ва Қизил майдон етакчилик қилди, 10-ўринни Санъатлар боғи Музеон эгаллади.

2015 йилда жаҳонда энг оммавий хэштег #love, Россияда #москва бўлди. Эмодзилар орасида “юракча” етакчи бўлди.

Instagram, шунингдек, бу йил киритган муҳим функциялар ҳақида ҳисобот берди. Хизмат март ойида фотоколлажлар яратиш имконини берувчи Layout дастурини ишга туширди. Ижтимоий тармоқ ёзда қидирувни яхшилади ва унда суратларни ҳам портрет, ҳам альбом кўринишида бериш имкони пайдо бўлди. Сентябрда ижтимоий тармоқ бутун дунё бўйлаб барча компаниялар учун реклама платформасини ишга туширди. Шу ойда Instagram’нинг фойдаланувчилари сони 400 млн дан ошиб кетди. Ижтимоий тармоқ октябрда ўзининг 5 йиллик юбилейини нишонлади.