Ўтган ҳафта мобайнида Ўзбекистон республикаси ҳудудида 190та ёнғин қайд этилган. Бу ҳақда Ўзбекистон Ички ишлар вазирлиги матбуот хизмати хабар берган.

Турли сабабларга кўра содир бўлган ёнғинларда 4 нафар фуқаро тан жароҳатлари олишган ва 3 нафар фуқаро ҳалок бўлган. Ушбу ёнғинларда 663 млн сўмдан ортиқ қурилиш конструкциялари ва 839 млн сўмга яқин моддий бойликлар ёнғиндан сақлаб қолинган.

Қорақалпоғистон Республикаси Қораўзак туманида яшовчи фуқаро А.Темировнинг уйида электр симларнинг қисқа туташуви натижасида ёнғин содир бўлиб, уйнинг 70 кв.м. майдонда том қисми ёниб зарарланган.

Фарғона вилояти Қувасой туманида яшовчи фуқаро М.Алиевнинг уйида электр симларнинг қисқа туташуви натижасида ёнғин содир бўлиб, уйнинг 40 кв.м. майдонда томи, шифт қисми ва уй жиҳозлари ёниб зарарланган. Ёнғин ўчириш вақтида уй эгасининг ўғли М.Олимов куйиш тан жароҳатини олиб шифохонага ётқизилган. 

Хоразм вилояти Гурлан туманида яшовчи фуқаро А.Юлдашевнинг уйида очиқ оловдан фойдаланишда эҳтиётсизлик оқибатида ёнғин содир бўлиб, молхонанинг 20 кв. метр майдонда том қисми ва ғамлаб қўйилган ҳашаги ҳамда қўшнисининг молхонасидаги 30 кв. метр майдонда том қисми ёниб зарарланган.

Ушбу ҳолатлар бепарволик ва эътиборсизлик туфайли содир бўлмоқда. Бундай ҳолатларга йўл қўймаслик учун ёнғин хавфсизлиги талабларини ёддан чиқармаслик, газ ва электр жиҳозлардан тўғри фойдаланиш, очиқ оловдан фойдаланишда эътиборсиз ва бепарво бўлмаслик сўралади.