Россиянинг “Лукойл” компанияси 2015 йилнинг 9 ойи давомида Ўзбекистонда газ қазиб олиш ҳажмини оширди. Бу ҳақда компания тақдим этган маълумотларга асосланиб Uzdaily.uz хабар бермоқда.

Компания маълумотларига кўра, Ўзбекистонда табиий газ қазиб олиш ҳажми 2015 йилнинг 9 ойи давомида 2014 йилнинг худди шу даврига нисбатан 26 фоизга ўсиб, суткасига 78,4 минг баррел нефть эквивалентига етган. 2014 йилнинг тўққиз ойи давомида Россия компанияси суткасига 62,4 минг баррел нефть эквивалентига тенг ҳажмда газ қазиб олган.

“Ўзбекистонда газ қазиб олиш ҳажмининг ўсиши ўтган 3 ой ичида “Қандим – илк газ” лойиҳаси (Шимолий Шоди ва Қувачи, Олот конлари участкаси)нинг ишга туширилиши ҳамда Гиссар лойиҳасидаги газ қудуқлари самарадорлигининг оширилиши ҳисобига қайд этилди”, - маълум қилади “Лукойл”.

Шунингдек, Ўзбекистонда разведка ва қазиб олиш учун ажратилаётган капитал ҳажми 2014 йил январь-сентябрь ойларидаги 549 миллион доллардан 2015 йилнинг тўққиз ойида 759 миллон долларга ошди. Ўсиш кўрсаткичи 38,25 фоизни ташкил этди.
Компания 2020 йилга қадар Ўзбекистонда газ қазиб олиш миқдорини йилига 17-18 миллиард куб метрга етказишни режалаштирган.