Бельгия ҳукумати Париждаги терактларни амалга оширишга алоқадорликда гумонланаётган яна икки киши қўлга олинганини маълум қилди, деб хабар бермоқда Associated Press ахборот агентлиги.

Прокуратура маълумотларига кўра, Брюссель аэропортида Марокашга учиб кетмоқчи бўлган Франция фуқароси ушланган. Таъкидланишича, у икки марта Сурияга боришга уринган.

Шунингдек, у Париждаги терактларда айбдор бўлган террорчи-худкушлардан бирига ҳамроҳлик қилган.

Иккинчи гумонланувчи аэропортда ўтказилган операция давомида ушланган.

Маълум қилинишича, эркаклар Бельгиянинг Моленбек коммунасида яшашган.
Қўлга олинганлар террорчилик фаолиятида иштирок этишда айбланмоқда.

Ноябрда Парижда бир қатор терактлар амалга оширилган. Кафе, “Батаклан” театридаги одамларнинг ўққа тутилиши ва “Стад де Франс” стадиони ёнидаги портлатишлар оқибатида 130 киши ҳалок бўлганди.