Калифорния штатидаги Сан-Бернардино шаҳарчасидаги жисмоний имкониятлари чегараланганлар марказида отишма уюштириб, 14 кишини ўлдирган ва 17 кишини жароҳатлаган 3 кишилик гуруҳ вакилларидан бирининг шахси тасдиқланди. NBC телеканали маълумотига кўра, қўлга олинган жиноятчининг исми Саид Фаруқ.

Гуруҳни бартараф этиш вақтида ўлдирилган жиноятчи аёлнинг шахси тасдиқланмаган. Қидирувдаги учинчи жиноятчи эса Саид Фаруқнинг акаси экани айтилган.

Бундан олдинроқ, ФҚБ Калифорниядаги отишма теракт сифатида баҳоланиши мумкинлигини истисно қилмагани тўғрисида хабар берилганди.

3 декабрга ўтар кечаси Калифорния штатининг Сан-Бернардино шаҳарчасида (Лос-Анжелес яқинида) номаълум шахслар жисмоний имконияти чекланган кишилар учун марказ ҳудудига бостириб кириб, тартибсиз равишда ўт очишган. Бу отишма натижасида 14 киши ҳалок бўлган ва 17 киши яраланган.

Калифорния полициясидан қочаётган жиноятчилар бомба портлатишган.

Бироз олдинроқ, бу отишмага марказдаги зиёфатда келиб чиққан жанжал сабаб бўлгани ҳақида хабар берилганди.