Финляндиянинг Nokia компанияси 4 декабрда немис автомобилсозлари консорциумига HERE картографик хизматини сотиш бўйича битимни ёпиши кутилмоқда. Бу ҳақда компания хабарида айтилмоқда.

Август ойидаёқ сотиш бўйича тузилган шартнома миқдори 2,8 млрд еврони ташкил қилади.

Ушбу хизматни сотиб олаётган компаниялар гуруҳи Audi AG, BMW Group ва Daimler AG компанияларини ўз ичига олади.

Nokia раҳбари Ражив Сурининг айтишича, компания шу тариқа “қайта шаклланишининг охирги босқичини якунлайди”. Унинг таъкидлашича, Nokia ҳозирда Франциянинг Alcatel-Lucent компанияси билан бирлашишга эътиборини қаратади. Бирлашиш бўйича ушбу битим 15,6 млрд еврони ташкил қилади.

2015 йилнинг 1-ярим йиллигида HERE хизмати Nokia’га 28 млн доллар операцион даромад келтирган бир вақтда, бутун 2014 йил давомида 1,4 млрд евролик зарар келтирган.