“Даракчи” газетаси ўтган сонларида кўтарилган биометрик паспорт олиш масаласини навбатдаги сонида давом эттириб, ўқувчиларни қизиқтираётган бир қанча саволларга жавоб берди. Қуйида бу билан боғлиқ муҳим масалаларга тўхталиб ўтамиз.

Саволларга Тошкент шаҳар Ички ишлар Бош бошқармаси Хорижга чиқиш, келиш ва фуқароликни расмийлаштириш бошқармаси марказ бошлиғи, майор Санжар Қосимов жавоб берди.
Унинг берган маълумотларига қараганда, 2015 йил охирига қадар биометрик паспорт олишга улгурмаган фуқароларга нисбатан Ўзбекистон Республикаси Маъмурий жавобгарлик тўғрисидаги кодекснинг 223-моддасига мувофиқ чора кўрилади.

Шунингдек, Қосимов болалар паспорт қандай ҳолатларда керак бўлиши ҳақидаги саволга жавоб берди.
“Ўзбекистонда болалар паспорти деган тушунча йўқ, - таъкидлади у. – Одатда 16 ёшга тўлган барча Ўзбекистон фуқаролари оддий паспорт билан таъминланадилар. Бу ёшга етмаган фуқаролар хорижга чиқиши зарур бўлган тақдирда истисно тариқасида биометрик паспорт олишлари мумкин”.

Шунингдек, хорижга чиқиш визаларини олиш масаласига ойдинлик киритилди: “Ўзбекистон Республикаси фуқароларига туризм, ўқиш, даволаниш ва бошқа мақсадлар учун хорижга чиқиш рухсатномаси (стикер) 15 иш кунида берилиши лозим. Хизмат топшириғи билан хорижга чиқаётган фуқароларга эса иш жойидан тақдимнома бўлган тақдирда чиқиш визаси 10 иш кунида расмийлаштириб берилади”.