Калифорния штатининг Сан-Бернардино шаҳарчасидаги жисмоний имконияти чекланганлар учун марказда отишма содир этган шахслар бу ҳужумни аввалдан тайёрлашгани маълум қилинди. Бу ҳақда полиция вакилига асосланиб, Fox News телеканали хабар тарқатган.

Сан-Бернардино полициясининг маълумотига кўра, шубҳали шахслар "ҳарбий тактикадан фойдаланишган ва узоқ вақт давомида ҳужумни давом эттиришни кўзлашган".

"Улар воқеа жойига қандайдир миссияни бажариш учун тайёр ҳолда келишган", дейди полиция бошлиғи.

Қайд этилишича, жиноятчилар ҳужумига учрагач, баррикада қурган марказ ходимлари ичкаридан олиб чиқилган.

Эслатиб ўтамиз, 3 декабрга ўтар кечаси Калифорния штатининг Сан-Бернардино шаҳарчасида (Лос-Анжелес яқинида) номаълум шахслар жисмоний имконияти чекланган кишилар учун марказ ҳудудига бостириб кириб, тартибсиз равишда ўт очишган. Бу отишма натижасида 14 киши ҳалок бўлган ва 17 киши яраланган.
Отишма уюштирганларнинг шахси тасдиқланган.

Ҳужум қилганлардан бири, аёл киши отиб ўлдирилган, яна бири (Саид Фаруқ) қўлга олинган.

Олдинги хабарларда бу гуруҳ полиция таъқибидан қочиш вақтида бомба портлатгани айтилганди.