"Реал"га Испания кубогидан четлатилиш жазоси таҳдид солмоқда. Жамоа 2 декабрь оқшомида бўлиб ўтган "Кадис"га қарши ўйинда дисквалификацияси мавжуд Денис Черишевни майдонга туширган.

Маълумотларга қараганда, Россия терма жамоаси ярим ҳимоячиси ўтган мавсумда "Вильярреал" таркибида Испания кубоги доирасида учинчи сариқ карточкасини олган ва битта ўйинни ўтказиб юбориши керак эди. У ўтказиб юбориши керак бўлган ўйин айнан "Кадис"га қарши баҳсга тўғри келганди.

Регламентга кўра, агар "Кадис" клуби бугун маҳаллий вақт билан 14:00гача шикоят билан мурожаат қилса, "Реал" Испания кубогидан четлатилади.

Эслатиб ўтамиз, худди шундай қоидабузарлик туфайли ўтган мавсумда "Осасуна" Copa Del Rey'дан дисквалификацияга учраганди. Ўшанда осасуналиклар Унаи Гарсияни дисквалификацияси бор ҳолда ўйнатишганди.

"Кадис" ва "Реал" ўртасидаги учрашувда мадридликлар 3:1 ҳисобида ғалаба қозонишди. Денис Черишев ҳисобни очган бўлса, Иско дублга эришган. Черишев биринчи таймдан кейин майдонга қайтмаган, унинг ўрнига Матео Ковачич туширилган.