Сенаторлар Ўзбекистон Республикасининг 2016 йилги Давлат бюджети ва давлат мақсадли жамғармалари бюджетлари, шунингдек, солиқ ва бюджет сиёсатининг асосий йўналишлари ҳамда “2016 йилги солиқ ва бюджет сиёсатининг асосий йўналишлари қабул қилингани муносабати билан Ўзбекистон Республикаси Солиқ Кодексига ўзгартиш ва қўшимчалар киритиш тўғрисида”ги Қонунни қабул қилишди. Бу ҳақда 12news.uz хабар бермоқда.

Қайд этиш жоизки, келгуси йилга шакллантирилган солиқ-бюджет сиёсатининг асосий йўналишларида, шунингдек, асосий макроиқтисодий кўрсаткичларда ялпи ички маҳсулотнинг 7,8 фоизга, саноат маҳсулотлари ишлаб чиқариш 8,2 фоизга, қишлоқ хўжалиги маҳсулотлари етиштириш 6,1 фоизга, капитал қўйилмалар ҳажми 9,6 фоизга ўсиши назарда тутилган.
2016 йилги Бюджетнома лойиҳасида микрофирма ва кичик корхоналарга мансуб бўлган хизмат кўрсатувчи корхоналар учун ягона солиқ тўлови ставкасини 6 фоиздан 5 фоизгача туширилиши таклиф этилмоқда. Бу мазкур корхоналар ихтиёрида 58,4 миллиард сўм қолдириш имконини беради.

2016 йилда Давлат бюджетининг ижтимоий харажатлари ЯИМнинг 11,9 фоизи ёки умумий харажатларнинг 59,2 фоизини ташкил этади. Келаётган 2016 йилда таълим соҳасига ЯИМнинг 6,8 фоизи ёки 2015 йилга нисбатан 16,6 фоиз ўсиш кўрсаткичига эга бўлади. Шунингдек, соғлиқни сақлаш соҳасига сарфланадиган маблағлар миқдори Ялпи ички маҳсулот ҳажмининг 2,8 фоизини ташкил этиб, мазкур жабҳадаги ислоҳотлар бўйича дастурларни амалга ошириш, аҳолига сифатли тиббий хизмат кўрсатиш даражасини оширишга йўналтиради.