Маълумки, Ўзбекистон Республикаси фуқароларига берилаётган янги биометрик паспортларнинг орқасига оқ қоғоз ёпиштирилган бўлади. Айрим фуқаролар ҳатто бу қоғозда муҳим нарсалар, масалан, биометрик маълумотлар сақланиши мумкинлигини тахмин қилиб, унга тегинмасликни маъқул кўришаётгани айтилган эди.

Бу масалани ойдинлаштириш мақсадида “Даракчи” газетасининг ўқувчиларидан бири савол билан мурожаат қилди. Саволга Тошкент шаҳар Ички ишлар Бош бошқармаси Хорижга чиқиш, келиш ва фуқароликни расмийлаштириш бошқармаси марказ бошлиғи, майор Санжар Қосимов жавоб берди.

“Бу оқ қоғознинг фуқаро учун ҳеч қандай зарур томони йўқ, - таъкидлади у. – Унда фақат паспортни тайёрлаган корхонанинг штрих-коди акс этган. Агар бу қоғоз сизга ёқмаса, уни олиб ташлашингиз мумкин”.