Россия Ташқи ишлар вазирлиги расмий вакили Мария Захарова ўзининг фэйсбукдаги саҳифасида Буюк Британия ташқи ишлар вазири Филип Хаммонднинг Россия президенти Владимир Путиннинг Сурия президенти Башар Асадга биргина қўнғироғи Суриядаги ихтилофга якун ясаши ҳақида айтган сўзларига изоҳ бериб ўтди.

Аввалроқ Хаммонд Путин Асадга телефон қилиб, унинг ўз лавозимини тарк этишга кўндира олса, унда Суриядаги фуқаролик урушига бир зумда якун ясаши мумкинлигини айтган эди.

“Хўш. Келинг аниқлаштириб олайлик. Агар ҳаммаси британиялик ҳамкасбларимиз айтаётгандек бўлса ва Асаднинг кетиши билан уруш якунланса, унда ИШИД қаерга кетади? Ёки уларга ҳам кимдир ўйин якунланганини айтиш учун қўнғироқ қиладими? Диққат, савол: ким ИШИДга қўнғироқ қилади?”, деб ёзди Захарова.

Ваҳоланки, бунгача Хаммонд ИШИДга қарши операция бир неча йилларга чўзилиб кетиши мумкинлигини айтаётган эди.