2015 йилнинг 21 декабрь куни пойтахтимизда “Эътироф” миллий мукофотининг тақдирлаш маросими бўлиб ўтиши мумкин. Бу ҳақда Kun.uz сайтига “Ўзбекнаво” эстрада бирлашмаси вакили маълум қилди. Унинг сўзларига кўра, айни пайтда Маданият ва спорт ишлари вазирлиги қошида махсус ишчи гуруҳи тузилган.

Ушбу масалага ойдинлик киритиш мақсадида Маданият ва спорт ишлари вазирлиги вакили билан боғланганимизда, ҳозирча бу ҳақда аниқ маълумот бера олмаслиги, айни пайтда Вазирлар Маҳкамаси баённомасини кутишаётганини маълум қилди. Фақатгина, Ўзбекистон ҳукуматига тақдим этилган ҳужжатда танлов номинацияларига ўзгартишлар киритилмаганини айтиб ўтди.

Эслатиб ўтамиз, 2014 йилнинг 26 декабрь куни “Истиқлол” санъат саройида “Эътироф-2014” мукофотининг тақдирлаш маросими бўлиб ўтган эди. Унда маданият, санъат, спорт, телевидение, радио каби соҳалар бўйича 24 номинация ғолиблари номи эълон қилиниб, мукофотлар ўз эгаларига топширилди. Жумладан, “Йилнинг энг яхши театр актрисаси” (Лола Элтоева), “Йилнинг энг яхши филми” (“Геолог”), “Йилнинг энг яхши кино актери” (Мирза Азизов), “Йилнинг энг яхши кино актрисаси” (Асал Шодиева), “Йилнинг энг яхши аёл эстрада хонандаси” (Муниса Ризаева), “Йилнинг энг яхши эркак хонандаси” (У.Раҳматуллаэв) каби номинациялар бўйича ғолиблар аниқланган эди.

Шунингдек, энг яхшилар орасида ҳунарманд, рассом, спортчи ва мураббийлар, радио, телевидение, санъатнинг бошқа йўналишларида фаолият юритаётганлар ҳам эътироф этилди.