«Ўзбекистон темир йўллари» акциядорлик компанияси 2016 йилнинг апрель ойида электрлаштирилган «Ангрен-Поп» темир йўл йўналиши қурилишини якунлайди. Бу ҳақда «Sputnik» нашри компания раҳбари Очилбой Раматов берган маълумотларга таяниб хабар тарқатмоқда.

«Биз мазкур қурилиш бўйича лойиҳани қайтадан таҳрирлаб чиқдик. Қурилиш ишларини 2016 йилнинг апрелига қадар тугатмоқчимиз. 15 апрелда янги йўналишда илк таркиб йўлга чиқади», — дея маълум қилган Раматов.

Раматовнинг сўзларига кўра, мазкур янги темир йўл Хитой-Марказий Осиё-Европа халқаро транзит йўналишида муҳим рол ўйнайди. Аввалроқ мазкур йўналиш июль ойида фойдаланишга топширилиши хабар қилинганди.

124 километр узунликдаги «Ангрен-Поп» темир йўл йўналиши қурилиши 2013 йилда бошланганди. Мазкур йўл «Қамчиқ» довони орқали ўтиб, Фарғона водийси (Андижон, Наманган ва Фарғона вилоятлари) ва Ўзбекистоннинг бошқа қисмини боғлаш учун хизмат қилади. Темир йўлнинг тоннел ўтган қисми лойиҳа қиймати 455 миллион долларни ташкил қилган бўлиб Хитойнинг China Railway Tunnel Group компанияси томонидан мазкур лойиҳа амалга оширилди.

Ушбу лойиҳанинги умумий қиймати 1,68 миллиард долларни ташкил қилган бўлиб мазкур маблағ халқаро молия институти кредитлари ва Ўзбекистоннинг ўз ҳисобидан қопланган.