Ҳиндистоннинг катталиги жиҳатидан тўртинчи шаҳри бўлмиш Ченнаи (Тамилнад штати маркази, эски Мадрас) кучли ёғингарчилик оқибатида сув остида қолиб кетди. Воқеа жойидан туширилган суратлар бир қатор онлайн нашрлардан, жумладан, Emirates247 порталининг Facebook’даги саҳифасидан ўрин олди.

Уларда кўринишича, одамлар уйларига етиб олиш учун кўкракларигача сув ичида кўча кесиб ўтишга мажбур бўлган. Улар орасида болали аёллар ҳам бор.

Охирги йилларда кузатилган энг кучли ёғингарчилик оқибатида минтақада 280 киши ҳалок бўлгани айтилмоқда. Бир неча соат давом этган жаладан сўнг шаҳар кўчалари сувга тўлди.
Айни пайтда, ёмғир тингач, одамлар жонига бўлган хавф бартараф этилган, деб ёзмоқда маҳаллий матбуот.

“Ёмғир ҳозир муаммо эмас, лекин тўлиб-тошиб кетган 30та кўл ва дарё шаҳарнинг тўрт туманини сув остида қолдирмоқда”, - хабар беради Reuters агентлиги.