Қозоғистоннинг Олмаота шаҳридаги Калкаман мавзесидаги 7-рақамли шаҳар шифохонасига портловчи модда ўрнатилгани ҳақида хабар берилганидан сўнг, шифохона ходимлари ва беморлар эвакуация қилинди.

"Бугун, 2015 йилнинг 4 декабрь кунида номаълум шахс томонидан қўнғироқ орқали Райимбек ва Авезов шоҳкўчалари кесишмасидаги 7-рақамли шаҳар шифохонаси ҳудудига портловчи модда ўрнатилгани ҳақида хабар берилди", дейилади хабарда.

Шундан сўнг бу ҳудудга қутқарувчи махсус хизматлар етиб борган ва одамларни хавфсиз ҳудудга кўчиришни бошлаган.

"Шифохона бинолари жойлашган ҳудуддан соат 09.20да эвакуация қилиш ишлари бошланди ва соат 10.40да якунланди. Бинодан жами 1700 киши олиб чиқилди, шундан 1100 нафари тиббиёт ходимлари, 600 нафари беморлар", дейилади ИИВ матбуот хизмати хабарида.

Ҳудуддан портловчи модда топилмаган.

Шунингдек, қўнғироқ қилган шахс аниқланиб, қўлга олинган ва унга нисбатан жиноий иш очилиши кутилмоқда.