Ўзбекистон терма жамоаси февраль ойида Туркияда ўтказишни режалаштирган йиғинни хавфсизлик туфайли бекор қилган. Бу ҳақда Moldfootball.com хабарига асосланиб, std.uz хабар тарқатган.

Ўзбекистон футбол федерацияси матбуот хизмати эса ҳозирча бу ҳақда маълум қилмаган.

Ўзбекистон терма жамоаси Анталиядаги йиғин давомида Молдова билан ўртоқлик учрашуви ўтказишни режалаштирганди. Эндиликда бу ўртоқлик ўйини Туркияда эмас, БААда ўтказилиши мумкин.

«Ўзбекистон футбол федерацияси факс йўллаб, хавфсизлик туфайли Туркиядаги йиғинини бекор қилганини маълум қилди ҳамда ўртоқлик ўйинини 9 февраль куни Дубайда ўтказишни таклиф қилди. Молдова футбол федерацияси ҳозирда БААда ўйнаш учун иккинчи рақиб қидирмоқда. Агар топилса, терма жамоа Дубайда йиғин ташкил қилади», – дея хабар қилган Молдова футбол федерацияси вице-президенти Ион Тестимицану.

Эслатиб ўтамиз, ЎФФ расмий сайти 25 ноябрь куни Молдова ва Ўзбекистон терма жамоалари ўртасида 2016 йилнинг 9 февраль санасида, Туркиянинг Анталия шаҳрида ўртоқлик учрашуви бўлиб ўтиши ҳақида хабар берганди.

Бироз олдинроқ эса, терма жамоалар маркази директори Асқар Толибжонов Молдова билан ўртоқлик учрашуви ҳақидаги хабар асоссиз эканлигини айтганди.