Россия ташқи ишлар вазири ўринбосари Григорий Карасин ва Ўзбекистон ташқи ишлар вазири Абдулазиз Комилов Ўзбекистон Президенти Ислом Каримовнинг Россияга сафарига тайёргарликни муҳокама қилишди, деб хабар бермоқда Россия Ташқи ишлар вазирлиги.

“Ўзбекистон ташқи ишлар вазири А.Х.Комилов билан учрашув бўлиб ўтди, унда Ўзбекистон Президенти Ислом Каримовнинг Россияга ташрифига тайёргарлик орқали икки томонлама муносабатларнинг масалалари муҳокама қилинди”, дейилмоқда хабарда.

Томонлар турли даражадаги алоқаларнинг юқори жадаллиги ва бир қатор соҳаларда Россия-Ўзбекистон ўртасидаги ўзаро муносабатлар амалий вазифаларининг ечимини таъкидлаб ўтдилар. Бундан ташқари, дипломатлар минтақадаги хавфсизлик масалаларини ҳам муҳокама қилишди.

“Икки томон Афғонистондаги вазиятнинг ёмонлашиши ва Марказий Осиё ҳудудидаги хавотирли тенденцияларнинг ошиши билан кучайиб бораётган террорчилик хавфига қарши кураш бўйича халқаро саъй-ҳаракатларни мувофиқлаштириш кераклигини айтишди. Россия томони Марказий Осиёда тинчликнинг беқарорлашувига йўл қўймаслик учун минтақа давлатлари билан турли йўналишдаги ўзаро ҳаракатларга тайёргарлигини билдирди”, деб айтилмоқда хабарда.

Россия президенти Владимир Путин июль ойида Уфада бўлиб ўтган Шанхай ҳамкорлик ташкилоти саммитида Ислом Каримовни Россияга ташриф буюришга таклиф қилганди. Учрашув 2015 йилда бўлиб ўтиши мумкинлиги айтилганди.