Ўзбекистонлик таниқли архитектор ва рассом Рафаэль Хайрутдинов Тошкентда 83 ёшида дунёдан кўз юмди. Бу ҳақда Kultura.uz манбасига асосланган ҳолда Ўзбекистон рассомлари академияси сайтида хабар берилган.

Рафаэль Хайрутдинов ўз ижодий фаолияти давомида 50дан ортиқ меъморлик лойиҳалари бўйича ишлаган, улардан 15таси Тошкент ва бошқа шаҳарларни безаб турибди.

Хусусан, унинг бевосита иштироки ва ҳаммуаллифлигида Бадиий академиянинг марказий кўргазмалар зали, Кино уйи, Беньков номли бадиий ўқув юрти бинолари каби йирик лойиҳалар амалга оширилган.

Шунингдек, унинг раҳбарлигида кўплаб меҳмонхона ва истироҳат боғлари, пойтахтдаги Қоратош мавзеси, Миробод бозори, Нукус кўчасидаги маиший хизмат уйи ва бошқа объектларнинг лойиҳалари ишлаб чиқилган.

Хайрутдинов ўз меҳнат фаолиятини 1957 йилда "Узгоспроект"да бошлаган, 1964 йилда эса "Ташгипрогор" институтида Тошкент шаҳрининг янги марказини лойиҳалаштириш бўйича тузилган гуруҳга жалб этилганди.

Бадиий академия марказий кўргазмалар залида шахсий кўргазмаси очилишига атиги икки кун қолганди.

Бугун очилган кўргазмада унинг хотираси учун 1 дақиқалик сукут сақланган. Маросимда рассомлар Акмал Нур ва Владимир Чуб, Марказий кўргазмалар зали директори ўринбосари Людмила Кодзаева ҳамда архитектор Серго Сутягин нутқ сўзлашган.