2005 йилда Ўзбекистон Республикаси Президентининг “Ўзбекистон Республикасининг жамоат таълим ахборот тармоғини ташкил этиш тўғрисида”ги ПҚ-191- сонли Қарори асосида ZiyoNET тармоғи ресурс маркази ва унинг Халқ таълими ҳамда Олий ва ўрта махсус таълим вазирликларидаги бўлинмалари ташкил этилган эди.

Ўтган 10 йил ичида кўплаб лойиҳалар ишга туширилди, таълим соҳаси ва ёшларнинг кундалик ҳаётида информацион-коммуникация технологияларини жорий этиш бўйича янгиликлар жорий этилди. Жумладан, ZiyoNET порталининг биринчи талқини 2006 йилда ишлаб чиқилиб, фойдаланувчиларга тақдим этилган эди. Сўнгги йилларда ZiyoNET порталининг интерфейси бир неча маротаба ўзгарди, портал маълумотлар ва бўлимлар билан бойиди.

Ҳозирги вақтда ZiyoNET порталида кутубхона, аудиокитоблар, e-Darslik, абитуриент, савол-жавоблар, гуруҳлар, арбоблар, ўйинлар, хорижий тиллар ва бошқа бўлимлар мавжуд.

Бундан ташқари, тармоқ ресурси тизими Tanlov.uz, uTube.uz, Fikr.uz, www.uz, ID.uz, zn.uz каби лойиҳаларни ҳам ўз ичига олади. Мазкур рўйхат 2015 йилда жаҳон маданий меросининг Meros.uz, шарқ пазандалигига бағишланган chakchak.uz сайтлари ҳамда таълимий uRadio.uz он-лайн радиоси билан тўлдирилди.