Бразилияда рестайлинг қилинган Chevrolet Cobalt намойиш қилинди. Седан дизайни марканинг янги корпоратив стилида ишланган.

Рио-де-Жанейро шаҳрида ўтказилган тақдимот маросимида маълум қилинишича, машина дизайни анча ўзгарган, моделнинг олд қисми Chevrolet`нинг фирма дизайнига мувофиқ равишда қайта ишланган: автомобилнинг чироқлари торроқ кўринишга келтирилган, радиатор панжараси ва туманга қарши чироқлар шакли ўзгартирилган.

Интерьерга эса деярли тегилмаган, фақат салон қулайликларига сенсорли дисплей ҳамда орқа кўриниш камераларига эга, iOS ва Android’даги смартфонлар билан ишлай оладиган MyLink II мультимедия тизими пайдо бўлган. Янгиланган Chevrolet Cobalt`нинг энг яхши комплектациясига ёруғлик датчиклари, орқани кўриш камералари ва чарм салон киради.

Бразилия бозоридаги Cobalt седанлари мижозларга 1.8 литрли 4 цилиндрли 110 от кучига эга атмосферали двигател билан таклиф этилади.

Янгиланган Chevrolet Cobalt автомобилининг Ўзбекистонда ишлаб чиқарилиши ҳақида ҳозирча маълумотлар йўқ.