АҚШ Давлат департаментидаги юқори лавозимли амалдор сўзларига кўра, ИШИДнинг Туркияга йирик миқдорда нефть етказиб бергани тўғрисида ҳамон далиллар йўқ, дея хабар бермоқда Fox News.

Амалдорнинг маълум қилишича, Суриянинг ИШИД назорати остидаги ҳудудлардан бир оз миқдорда нефть контрабандаси бўлгани инкор этилмайди. Унинг айтишича, узун йўл ва кўп сонли патруль постлари сабабли контрабанда молиявий жиҳатдан ўзини оқламайди. Шунингдек, ташқи сиёсат маҳкамаси вакили АҚШ бошчилигидаги халқаро коалиция ва турк самолётлари террористлар фаолиятини қийинлаштирган бўлиши мумкинлигидан умид билдириб ўтди. Унинг таъкидлашича, ИШИД нефтининг асосий харидори Башар Асад тузуми ҳисобланади.

Бундан аввалроқ эса АҚШ Давлат департаменти вакили Марк Тонер террористлар нефтининг Туркия чегаралари орқали тарқалаётгани, айнан шунинг учун ҳам АҚШ Анқарадан буни тўхтатишни сўраётганини маълум қилган эди.