Туркия президенти Ражаб Тойиб Эрдўған турклар Россия ўрнига бошқа энергетика таъминотчиси топа олишига ваъда берди. Бу ҳақда The Daily Star нашрида ёзилган.

"Бошқа таъминотчини топишимиз мумкин", деган президент.

Россиянинг ўрнини эгаллаши мумкин бўлган давлатлар сифатида Қатар ва Озарбайжон давлатлари номи айтилган.

Бироз олдинроқ, Туркия бош вазири Аҳмад Довудўғли Туркия Озарбайжондан газ сотиб олиш ҳажми оширилиши ҳақида маълум қилганди.

Шу вақтгача, Россия Туркияга энг катта газ етказиб берувчилардан бири ҳисобланарди.
24 ноябрда Туркиянинг F-16 қирувчи ҳарбий самолёти Россиянинг Су-24 ҳарбий бомбардимончи самолётини Сурияда уриб туширгандан кейин, Туркия ва Россия ўртасидаги муносабатлар совуқлашди. Россия президенти Путин бу ҳаракатдан кейин миллий хавфсизликни таъминлаш чора-тадбирлари ва Туркияга нисбатан махсус иқтисодий чораларни қўллаш тўғрисидаги фармонга имзо чекди ва Россия ҳукумати ушбу фармонни ривожлантириш тўғрисидаги қарорини 2015 йил 1 декабрь куни эълон қилди.