Шимолий Корея раҳбари Ким Чен Инни янги аэропортга ташрифи чоғида портлатиб юбормоқчи бўлишгани ҳақида хабар пайдо бўлди.

Ёш доҳийнинг ҳаётига суиқасд уюштирилгани тўғрисида маълумот аниқлангач, унинг ташрифлари бекор қилинган.

Сегодня.ua хабарида ёзилишича, унинг янги қурилган Вонсан аэропортига ташрифи чоғида суиқасд уюштирмоқчи бўлишган. Соқчилар бинодан портловчи қурилмаларни топган ва сафар бекор қилинган.

Октябрь ойи бошидан бери Ким Чен Ин Корея Меҳнат партиясининг 70 йиллигига атаб қурилган янги объектларни шахсан кўздан кечиришга киришганди. Вонсан шаҳридаги янги Кальма аэропортига ҳам сафар уюштирилиши режалаштирилган, бироқ текширув чоғида аэропорт томидан ҳар бири 200 граммлик 100 га яқин динамит шашкаси топилган.

Айни вақтда бу ҳодиса бўйича текширув ишлари олиб борилиши давом этмоқда, аэропорт эса тайёр бўлганига қарамасдан ишга туширилмасдан ётибди.

Қайд этилишича, Вонсандаги бу аэропорт ҳарбий мақсадларда фойдаланган. Унда хориждан рейсларни қабул қилиш имкониятини яратиш мақсадида реконструкция ишлари олиб борилган. Ким Чен Иннинг ташаббуси билан амалга оширилган бу ишдан мақсад КХДРнинг хорижлик сайёҳлар учун очиқлигини намойиш этиш ҳисобланади.