Ироқ президенти Фуад Маъсум Шимолий Ироқдаги Мосул шаҳри яқинидаги Бошиқ туманига турк ҳарбийлари бўлинмасининг ташланишини халқаро ҳуқуқ меъёрларининг бузилиши деб атади ва бу ердан турк қўшинларининг зудлик билан олиб чиқиб кетилишини талаб қилди. Бу ҳақда Reuters ахборот агентлиги маълум қилди.

Шунингдек, Маъсум Ироқ ташқи ишлар вазирлигидан мамлакатнинг дахлсизлиги ва мустақиллигини қўриқлаш учун зарур бўлган чораларни кўришни сўради.

Аввалроқ маълум қилинганидек, турк ҳарбийлари бўлинмаси Бошиқ туманига жойлаштирилган. CNN-Turk телеканалининг маълумотларига кўра, 130 нафар турк ҳарбийси икки йилдан кўпроқ давом этаётган курд лашкарларини ўқитиш дастури доирасида режа асосида ташланди. Баъзи маълумотларга кўра турк ҳарбийлари ходимларни ротация қилиш доирасида ташланган. Турк ОАВларида, шунингдек, ушбу туманга 20-25 танк етказилгани ҳақида хабар пайдо бўлди.

4 декабрда АҚШ Қуролли кучлари маълум қилганидек, Туркия ўзи мустақил равишда Ироқ шимолига ҳарбийларни ташлаган. “АҚШ Туркия Ироқ шимолида юзлаб ҳарбийларини жойлаштирганини билади, бироқ бу қадам АҚШ бошчилик қилаётган коалиция ҳаракатларининг бир қисми ҳисобланмайди”, деб икки америкалик ҳарбийнинг айтган гапларини келтириб ўтди Reuters ахборот агентлиги.