2015 йилнинг 3-4 декабрь кунлари Белград шаҳрида (Сербия) Европада хавфсизлик ва ҳамкорлик ташкилоти (ЕХҲТ) Ташқи ишлар вазирлари кенгашининг 22-мажлиси бўлиб ўтди.

Ўзбекистон Республикаси Ташқил ишлар вазирлиги матбуот хизматининг хабар беришича, мажлисда ТИВ раҳбарлари Сербия Республикаси бош вазирининг биринчи ўринбосари, ташқи ишлар вазири, ЕХҲТнинг амалдаги раиси Ивитса Дачичнинг ҳамда ЕХҲТ бош котиби Ламберто Занниэрнинг маърузаларини тингладилар. Шунингдек, кун тартибининг долзарб масалалари, аввало ЕХҲТ ҳудудида хавфсизликни таъминлаш муаммолари муҳокама қилинди.

Мажлис якунида терроризм, коррупция, пул ювишга қарши курашишга йўналтирилган ҳамда хавфсизликка таҳдид солувчи трансмиллий хатарлар бўйича қарорлар қабул қилинди.
2016 йил 1 январдан ЕХҲТда раислик қилувчи Германияда ТИВКнинг навбатдаги мажлиси бўлиб ўтиши белгиланди.

Ўзбекистон делегацияси 22-мажлисда иштироки доирасида Испаниянинг ташқи ишлар бўйича давлат котиби Игнасио Ибанес, АҚШ Давлат котибининг Жанубий ва Марказий Осиё ишлари бўйича ёрдамчисининг ўринбосари Даниэл Розенблум ҳамда ЕХҲТ бош котиби Ламберто Занниэр билан икки томонлама учрашувлар ўтказди.
Учрашувларда томонларни қизиқтирган масалалар кўриб чиқилди.