"Валенсия" жамоасига янги бош мураббий сифатида тайинланган Гари Невилл қишки трансферлар вақтида "Лестер" жамоаси ҳужумчиси Жейми Вардини Испанияга олиб ўтмоқчи. Бу ҳақда Британиянинг Daily Star нашрида хабар қилинган.

Эслатиб ўтамиз, ўтган ҳафтада "Валенсия" "МЮ"нинг собиқ футболчиси Гари Невиллни жамоага янги бош мураббий сифатида тайинлади. Невилл кеча Вигога борди ва жамоанинг "Барселона"га қарши учрашувини трибунадан туриб кузатди.

У раҳбарият билан учрашуви вақтида айни вақтда "Лестер" сафида ёрқин ўйин намойиш этаётган ва АПЛ тўпурари бўлиб турган 28 ёшли ҳужумчи Жейми Вардини трансфер қилиш кераклигини айтган.

Маълумот учун, Варди жорий мавсумнинг 15 турида 14та гол урган, шунингдек, кетма-кет 11 учрашувда майдонни голсиз тарк этмаган ҳолда лига рекордини ўрнатган.

Бироз олдинроқ, "Лестер" раҳбарияти ўзининг бу футболчиси учун камида 30 миллион фунт олмоқчи эканини билдирганди.

Унга "Барселона" ва "Реал" жамоаларидан ҳам қизиқиш билдирилган.