АҚШ президенти Барак Обама ўзининг мурожаатида Конгресс Сурияда ИШИДга қарши курашни давом эттиришга рухсат бериши лозимлигини таъкидлади. Айни пайтда АҚШ у ердаги операцияни олий бош қўмондон бўлган президентнинг топшириғига биноан амалга оширмоқда. Аммо республикачилар президентнинг террорга қарши кураши етарли самара бермаяпти деб ҳисобламоқда.

Ўз навбатида, Барак Обама, ИШИДни йўқ қилишга ваъда бергани билан, ер усти операцияси ўтказилмаслигига ишора қилди. Республикачиларнинг фикрича эса, бундай ҳарбий амалиётсиз рақибни бутунлай тор-мор келтириб бўлмайди. Ироқ ва Суриядаги жангариларга ҳаводан зарба бериш билан иш битмайди, деб ҳисобламоқда улар.
Шу билан бирга, Обама Конгресс олиб борилаётган ҳарбий ҳаракатларни тасдиқлашни яна бир бора сўради.

“Конгресс америкаликлар ташқи хатар олдида бирлашганини ва бу курашга содиқлигини кўрсатадиган пайт келди”, - таъкидлади Оқ Уй раҳбари.
Бугунги кунга қадар Суриядаги ҳарбий амалиётларга сарфланган маблағ 5.2 млрд долларни ташкил қилмоқда, лекин натижа ҳалигача кўринмаяпти. Бу ҳам мухолиф кучлар ва республикачилар партияси намояндаларининг кескин танқидларига сабаб бўлмоқда.

Халқаро хавфсизлик соҳаси мутахассиси профессор Игорь Зевелевнинг фикрича, АҚШда президентлик пойгаси бўлаётгани туфайли ҳар қандай масала катта сиёсат даражасига олиб чиқилмоқда. Шунга қарамай, бугунги кунда мамлакатда Сурия масаласига бўлган ёндашув сиёсатчи ва фаолларни икки қутбга ажратмоқда: истеблишментнинг бир гуруҳи қатъий чоралар кўриш тарафдори бўлса, бошқа қисми изоляционизм йўлидан бориш ҳамда мўътадил тадбирларни амалга ошириш тарафдорларидир.