Ўзбекистонлик таниқли қизиқчи Обид Асомов Инстаграм ижтимоий тармоғида фаоллик кўрсатишда давом этмоқда. Кейинги постларидан бирида у мухлисларига мурожаат қилиб, умумий саволларга жавоб бериб ўтган.

"Ҳурматли мухлисларим! Шунча мақтовларни эшитиб, эриб кетмасам бўлди сартёғдай. Сизларнинг дуоларингиз билан шунчалик юрибман! Кўп марта қайтариладиган саволларга яна бир марта жавоб бермоқчиман. Саҳнага чиқиш, концерт бериш ва телевидениеда кўриниш менинг қўлимда эмас. Афсуски, Обид Асомов ҳаммага ҳам бирдай ёқмайди! Арабларда "ас сабр" деган ибора бор. Ўзбекчаси "сабр таги раҳмон". Вақти-соати келар. Мен беш йилдан бери тайёр турибман. Тошкентдаман, кўчиб ёки қочиб кетганим йўқ. Эшигимга сўраб келаётганлар бор. Ҳар куни халқ хизматидамиз, Аллоҳга шукр! Дунёда бўлаётган шунча тўполонлар олдида менинг саҳнага чиқиш-чиқмаслигим умуман муҳокама қилинадиган муаммо ҳам эмас. Юртимиз тинч бўлсин. Ёмонлардан асрасин. Эрталаб кўзимни очаман, дунёни кўраман, демак тирикман. Тўйларга айтишяпти, демак кимгадир керакман. Фарзандлар, набиралар соғ-омон мактабига, боғчасига бораяпти. Беадад шукрлар яратганга! Мен бахтли инсонман! Бу "кизил гаплар" эмас чин юракдан чиққан гаплар", деб ёзади Обид Асомов.