Бугун, 7 декабрь куни, соат 12:50да Ўзбекистонда навбатдаги ер қимирлаши кузатилди.

Силкиниш ҳақида ҳозирча бирор расмий маълумот эълон қилинмади. Лекин ижтимоий тармоқларда мамлакатнинг турли бурчакларида турган фойдаланувчилар ўзлари кузатган табиий офат ҳақида ёзишди.
Қашқадарёлик айрим фойдаланувчиларнинг тахмин қилиб ёзишича, ушбу вилоят ҳудудида силкиниш магнитудаси 4-5 баллни ташкил қилган. 

Охирги маълумотларга қараганда, ер ости силкинишларининг кучи Тошкентда 3-3.5, Наманганда 3.5, Фарғонада 4 баллни ташкил қилган.

Охирги бир-икки ой мобайнида Ўзбекистонда ва умуман Ўрта Осиё давлатларида турли кучга эга ер қимирлашлари мунтазам равишда тез-тез кузатилмоқда. Бу халқ орасида ваҳимали гап-сўзларнинг тарқалишига олиб келди. Аммо ЎзФА Сейсмология институти мутахассислари бундай мишмишларни инкор қилишди.