“Япониянинг йил автомобили” (Japan Car of The Year, JCOTY) танлови ташкилотчилари журналистлар ва экспертлар ўртасида овоз бериш натижаларига якун ясаб, 2015 йилнинг энг яхши автомобиль моделини аниқлашди. Кетма-кет иккинчи йил 1-ўринга Mazda компанияси лойиқ деб топилди. Компаниянинг янги авлоддаги MX-5 родстери йил автомобили деб топилди.

Танловнинг финал босқичида ғлабага яна 9 та модель даъвогарлик қилди. Булар: Suzuki Alto, Subaru Outback/Legacy, Toyota Senta, Nissan X-Trail, Honda S660, BMW 2-Series Active Tourer, Jaguar XE, Fiat 500X и Tesla Model S P85D.

Дастлаб ушбу танловга 45 та модель: 24 та япон, 18 та европа ва 3 та америка модели қўйилганди.

Танлов ҳакамлар ҳайъати 60 кишидан ташкил топди. Ҳар бир машинага 1 баллдан 10 баллгача баҳо берилди. Натижада танлов ғолиби Mazda MX-5 442 балл йиғди, 2-ўринни эгаллаган “Хонда” S660 – 401 балл, 3-ўринни эгаллаган BMW 2-Series Active Tourer 177 балл тўплади. Юқори ўнталикдаги охирги ўринни Nissan X-Trail модели эгаллади.

Ўтган йили танловда 1-ўринга Mazda2 хэтчбеки лойиқ деб топилган эди. 2013 йилда эса Японияда йил автомобили номига Volkswagen Golf сазовор бўлганди. Бу ҳолат 34 йил ичида биринчи марта Японияда хорижда ишлаб чиқарилган автомобиль йил автомобили деб топилган биринчи ҳолат бўлганди.