Қозоғистоннинг Атиров вилоятида жорий йилда 40 нафар мактаб ёшидаги қиз ҳомиладор бўлиб қолгани аниқланди. Уларнинг ярми туманлардан вилоят марказига кўчиб келганлардир. Шу муносабат билан тиббиёт ходимлари қизларга 3-4-синфдан аёллар гигиенасини ўргатиш керак, деб таъкидламоқда.

Бунинг юзасидан Соғлом турмуш тарзи вилоят марказида ўтказилган давра суҳбатида тиббиёт ходимлари ва жамоатчилик фаоллари масалани қизғин муҳокама қилишди.

“Оқ Жойиқ” нашрининг хабар беришича, 1-рақамли шаҳар поликлиникаси гинекологи Айқияш Шунаева 2011 йилда 15-16 ёшли қизлардан 6 нафари ҳомиладор бўлиб қолган бўлса, кейинчалик бу кўрсаткич кўтарила борганини, 2012 йилда 6, 2013 йилда 13, 2014 йилда эса 11 нафарни ташкил этганини тан олди. Эслатиб ўтамиз, бу фақат Шунаева ишлаётган муассасада қайд қилинган ҳолатлардир. Жорий йилда 1-сонли поликлиникада 6та вояга етмаган қиз ҳомиладор бўлиб қолгани рўйхатга олинган бўлса, 2-поликлиникада 5та, 7-поликлиникада 10та, 4-поликлиникада эса 18та шундай ҳолат қайд қилинган.

Бундан ташқари, “Жарқин болашақ” соғлиқ маркази раҳбари Алиа Сиралиеванинг маълумотларига қараганда, 14-15 ёшдаги қизлар орасидаги ҳомиладорлик ҳолатлари 2014 йилда 7 маротаба, 2015 йилда эса 4 маротаба кузатилган.