Оқ уйда Fox News телеканалининг икки шарҳловчисининг АҚШ президенти Барак Обама ҳақидаги кескин сўзлари учун икки ҳафтага ишидан четлатилганига изоҳ берилмади, деб хабар бермоқда маҳаллий ОАВлар.

“Аввалроқ Fox News ходимлари – подполковник Ральф Питерс ва Стейси Дэш турли кўрсатувларда иштирок этаётиб, жонли эфирда йўл қўйиб бўлмайдиган ва ножоиз шарҳлар айтишди”, деб айтди телеканал вице-президентларидан бири Билл Шайнон.

Питерс ва Дэш телеканалнинг жуда муҳим таҳлилчилари ҳисобланади. Улар Обаманинг мамлакатга мурожаатига шарҳ бериш давомида қўпол сўзлар ишлатишган. 

Питерс президентни “душманларга тегишни истамаслигини”, Дэш эса Обаманинг бош мавзуга бепарволигини танқид қилди.  

Кўрсатув бошловчиси Стюарт Варни таҳлилчиларни бўлиб, улар кўрсатувда “бундай тилдан” фойдалана олмасликларидан огоҳлантирди.

Кейинроқ Питерс ўз сўзлари учун узр сўраган.

“Мен жаҳлимга эрк берганим учун кечирим сўрайман. Бироқ менинг фикримча, америка халқи мени тушунади. Мен нотўғри сўзларни танладим, бироқ менинг туйғуларимга кўпчилик қўшилади”, деб айтди Питерс.

Стейси Дэш эса вазиятга ўз твиттерида изоҳ берган.

“Оқибатлар. Баъзилар тўлашга мажбурлар. Бажонидил” дейилмоқда хабарда.

CNN телеканалининг маълум қилишича, Fox News телеканали кўпинча Обамани танқид қилади, ьироқ вазминлик билан, унинг эфирида кам ҳолларда беадаб ва қўпол сўзлар ишлатилади.

Обама ўз нутқида Сан-Бернардинодаги отишма тергови бўйича маълумотлар берган ҳамда конгрессни мамлакатда автоматик қурол сотишни чеклашга чақирди.