Қирғизистонлик мухолиф сиёсатчи, парламентнинг собиқ депутати, “Ор-номус” партияси етакчиларидан бири Равшан Жеенбековнинг баёнотига кўра, Қирғизистоннинг реал ташқи қарзлари ЯИМнинг 70 фоизини ташкил қилади. Бу ҳақда у EADaily нашрига берган интервьюсида маълум қилди.

“Ҳа, ташқи қарзларимиз Маастрихт талабларидан ўтиб кетди – ЯИМнинг 60 фоизи. Қирғизистон ҳукумати 58-59 фоиз ҳақида гапирмоқда, расмий маълумотга кўра, бу 3 млрд 600 млн доллар. Ёлғон. Бугун Қирғизистоннинг ташқи қарзи ЯИМнинг 70 фоизини ташкил қилмоқда. Мамлакат учун бу инвестицияларнинг қисқариши демакдир. Жаҳон банки, Халқаро валюта жамғармаси сингари халқаро институтилар биз билан бошқача оҳангда гаплаша бошлайди”, - маълум қилди сиёсатчи.

Унинг маълум қилишича, охирги йилларда Қирғизистон 2-2.2 фоиз йиллик тўлов эвазига катта миқдорда қарзлар олган ва қарзлар талаблари бўйича ўзини банкрот деб эълон қила олмайди, негаки қарзлар парламентлар томонидан ратификацияланган икки томонлама шартномалар билан назорат қилинади.