Қирғизистон ҳукумати вазирлар маҳкамаси тузилмасидаги ўзгаришларни ҳисобга олиб ишлаб чиқилган 2016 йил учун бюджет лойиҳасини маъқуллади. Ушбу қарор 8 декабрдаги йиғилишда қабул қилинди.

Қирғизистон молия вазири Одилбек Қосималиевнинг айтишича, кейинги йил учун бюджет структурасида жиддий ўзгаришлар бўлмади. Бироқ ғазнанинг даромад қисми 4,6 млрд қирғиз сўмига ошади. Бюджетнинг дефицити 5,5 фоиздан 4,5 фоизга қисқартирилади. Бюджетнинг харажатлар қисми халқаро ташкилотларга аъзолик бадалининг тўланиши зарурати, Давлат ипотека компаниясининг моддий капиталини яратиш ва республикада эпизоотик (ҳайвонларда юқумли касалликларнинг тарқалиши) ҳолатни яхшилаш тадбирларини молиялаштириш ҳисобига ошди.

“Бюджет лойиҳаси августда қабул қилинганди. Уни ҳаттоки Жогорку Кенеш кўриб чиқишига киритганмиз. Бироқ кейин янги парламент келиб, коалиция туздик ва ҳукуматнинг янги структурасини қабул қилдик. Шу ўзгаришлар туфайли биз бюджет лойиҳасини қайта ҳисоблаб чиқиш учун ортга қайтиб олдик. Биз харажат қисмига оқилона ёндашдик. Баъзи тадбирларга ҳозирча пуллар кўзда тутилмаган, бироқ вазирлик ва бошқармалар ташвишланмасалар бўлади. Агар биз йирик лойиҳаларимизни амалга оширсак, унда қўшимча маблағлар ажратамиз. Маъқулланган бюджет лойиҳасини яқин вақтда парламентга юборамиз. Биз депутатлардан бюджетни 2015 йил охиригача қабул қилишларини сўраймиз”, деб айтди Қирғизистон бош вазири Темир Сариев.