Reuters манбаси Сурия армиясига берилган авиазарба учун жавобгарликни Россияга ағдарди

Жаҳон 08 Декабрь 2015 9245

АҚШнинг фикрича, Дайр-аз-Зайр вилоятида Сурия армияси лагерига берилган авиазарба учун жавобгарлик Россия зиммасида ётади. Бу ҳақда АҚШлик ҳарбий амалдорлардан бири маълум қилди, деб хабар бермоқда Reuters ахборот агентлиги.   

Номаълум бўлиб қолишни истаган манбанинг изоҳларидан келиб чиқиладиган бўлса, АҚШ Башар Асадга мойил бўлган қўшинларга зарба берилишига алоқаси йўқ.

Аввалроқ 7 декабрда Сурия Ташқи ишлар вазирлиги ўз қўшинлари лагерига ҳужум қилинишида 65 та давлатдан тузилган халқаро коалицияни айблади: “АҚШ бошчилик қилаётган коалиция томонидан Дайр-аз-Зайрдаги Сурия армияси лагерларидан бирига қилинган тажовуз нафақат террорчиликка қарши саъй-ҳаракатларга тўсқинлик қилади, балки бу коалициянинг террорчиликни йўқ қилишдан манфаатдор эмаслигини тасдиқлайди”, деб айтилмоқда Сурия ТИВ хабарида. Дипломатларнинг таъкидлашича, ҳужум оқибатида 3 аскар ҳалок бўлди, 13 нафари яраланди, шунингдек 4 автомобиль, қурол-аслаҳа ва ўқ-дорилар омбори вайрон қилинди.

Шунингдек, халқаро коалиция матбуот котиби альянс кучлари Сурия ҳукумати кўрсатган ҳудудга зарбалар берилганини инкор этди. “Биз Сурия томонининг ҳисботларини кўрдик, бироқ кеча биз вилоятнинг бу қисмида ҳеч қандай операциялар ўтказмадик”, деб айтди коалиция полковниги Стив Уоррен. Унинг таъкидлашича, коалиция суриялик ҳарбийлар жабрланган ҳудуддан 55 км узоқликда ҳаракат қилган.

Кўпроқ янгиликлар