ИШИД террорчилик гуруҳи пахта сотишдан ҳам даромад олмоқда, деб хабар бермоқда Швейцариянинг Tribune de Geneve газетаси. Нашрнинг таъкидлашича, пахта Туркия орқали транзит қилинмоқда.

Газета журналистлари маълумотларига кўра, Сурияда фуқаролик уруши бошлангунча пахта мамлакат экспортида катта ўрин тутган, ҳозирда эса аксарият пахта майдонлари устидан назоратни ИШИД ўз қўлига олган. “Хомашё Туркия орқали ўтади, Туркия уни пахтани оқартиришдан даромад олувчи воситачилардан олади”, дейилмоқда газетада. Кейин пахта хорижий брендларнинг кийим-кечакларини тикишда ишлатилади.

“ИШИД ҳар куни нефть экспорти, мол-мулкни талон-тарож қилиш, товон пули олиш мақсадида одамларни ўғирлашдан оладиган 2 млн доллардан ташқари пахта экспортидан ҳам қўшимча даромад олади”, деб айтмоқда мақола муаллифи.   

Аввалроқ 7 декабрда ИШИДнинг ҳар ойдаги даромади 80 млн долларга етиши маълум қилинганди. Шундай фикрга АҚШнинг IHS тадқиқот маркази таҳлилчилари келдилар.

Марказ маълумотларига кўра, ИШИД даромадининг 50 фоизини гуруҳ томонидан назорат қилинувчи ҳудудлардаги тижорат фаолиятидан олинадиган солиқ ҳамда ерлар ва мол-мулкнинг мусодара қилиниши келтиради. Террорчилик гуруҳи 43 фоиз даромадини нефть сотишдан олади. Қолган даромад эса гиёҳванд модда сотиш, тарихий асори-атиқалар билан ноқонуний савдо, электр энергия етказиб беришдан олинади.