Воронежда ҳуқуқ-тартибот муассасаларининг собиқ тезкор ходими Валерий Мочалов бир неча кишини қийноққа солиб, айбини бўйнига олишни ёзишга мажбур қилгани учун 3 йил 7 ойга колонияда қамоқ жазосини ўташга маҳкум қилинди.

Ушбу иш бўйича ўтаётган яна бир полициячи Александр Новиковга нисбатан ҳукм ўзгаришсиз қолди. У Мочалов билан бирга уч ака-укани қийнагани учун уч йилга озодликдан маҳрум этилди.

Маълумотларга кўра, аввал Мочаловга 3 йил 6 ой қамоқ жазоси эълон қилинган, бироқ у бир ойга оширилган. Бунга собиқ полициячининг Ўзбекистон фуқароси соғлиғига оғир шикаст етказгани сабаб бўлган. Ўзбекистонликнинг дўппослашлардан жигари ёрилиб кетган. Айнан шу воқеадан кейин полиция бўлимида қийноқлар қўлланиши ҳолати ошкор бўлган.

2012 йил мартида полициячилар полиция бўлимига воронежлик аёлнинг номусига тегишда гумонланган ўзбекистонлик жигаридан шикастлангандан кейин тез тиббий ёрдам машинасини чақиртиришган. Унинг соғлиғига оғир зиён етказилиши бўйича текширув ўтказилган ва унинг давомида полицияда бошқа қийноққа солиш ҳолатлари ҳам аниқланган. Ҳаммаси бўлиб ушбу иш бўйича 5 киши жабрланувчи деб тан олинган.

Жабрланувчилар орасида 2011 йил майида бир неча автомобилни олиб қочишда гумон қилинган уч ака-ука ҳам бўлган. Суд полициячилар уларни ток билан қийнагани, устларига стул қўйиб унга ўтиргани, иккита стол ўртасида маҳкамланган металл трубага осишганини аниқлади. Жабрланувчилар қийноқларга чидолмай ўз айбларини бўйниларига олиб келишганини ёзиб беришган.

Қийноқларда иштирок этган полициячилар ўз хизмат ваколатларини зўравонлик ва махсус воситалар қўллаб суиистеъмол қилиш моддаси бўйича айбдор деб топилди.

Маълумотларга кўра, Мочалов тергов давомида уй қамоғида бир йил 2 ой ўтказган. Ҳукм эълон қилингандан кейин тергов изоляторига юборилган ва у ерда ҳам бир йил 4 ой ўтказган. Агар ҳукм кучга кирса, зўравон муддатдан олдин-шартли озодликка чиқарилишини сўраши мумкин.