“Қозоғистон-Хитой” газ қувурининг ўтказиш қуввати йилига 55 млрд кубометрга етказилади. Айни пайтда бу кўрсаткич йилига 30 млрд кубометрни ташкил қилмоқда.

Бу ҳақда 7 декабрь куни Қозоғистон президенти ҳузуридаги Марказий коммуникациялар хизматида бўлиб ўтган “Газ узатишнинг янги йўналишлари” мавзуидаги брифинг чоғида айтилган.
Тадбирда ҳисобот билан чиққан энергетика вазирининг ўринбосари Мағзум Мирзағалиев бир ҳафта муқаддам Олмаота вилоятининг Жамбул туманида газ қувурининг учинчи “С” чизиғи ҳамда иккита компрессор станциялари ишга туширилганини маълум қилди.

Шу билан бирга, қурилаётган яна 6та компрессор станцияси 2017 йилда тайёр бўлади, шундан сўнг “С” чизиғининг самарадорлиги йилига 25 млрд кубометрни ташкил қила бошлайди. Натижада газ қувурининг умумий қуввати бугунги 30 млрд кубометрдан 2017 йилда 55 млрд кубометрни ташкил эта бошлайди.