Германиянинг спорт кийим-кечаги ва анжомлари ишлаб чиқарувчи Adidas компанияси Parley for the Oceans ташкилоти билан ҳамкорликда океандаги чиқиндилардан ишланган кроссовкалар концептуал моделини намойиш қилди. Уларни яратишда 3D-босма технологиясидан фойдаланилди.

Пойафзал иқлим масалаларига бағишланган COP21 анжуманида намойиш қилинди. Дизайнерлар қайта ишланган пластикни кроссовканинг ҳам таг қисми, ҳам тепа қисмида ишлатишди.

“Биз Parley for the Oceans билан бирга экологик тоза материаллар яратиш бўйича чоралар кўришни ва янги технологияларни киритишни бошладик”, деб айтди Adidas Group ижроия кенгаши аъзоси Эрик Лидтке.

1948 йилда Германияда ташкил этилган компания Parley for the Oceans ташкилоти билан 2015 йил баҳоридан ҳамкорлик қилмоқда.

Кроссовкалар индивидуал ўлчамлар бўйича тайёрланади. Бунинг учун дўконга ташриф буюрувчилар бир неча дақиқа давомида югуриш қурилмасида югуришлари керак бўлади. Шундан кейин мижоз товонининг аниқ қолипи олинади ва бу қолип асосида ўзига хос тагчарм ишлаб чиқилиб, 3D-принтерда босилади.