Туркия ўз суверентитетини ҳимоя қилиш учун барча зарур чораларни кўради. Туркия президенти Ражаб Тойиб Эрдўғаннинг расмий вакили Иброҳим Калин Босфор бўғозида Россияга тегишли ҳарбий кема аскари елкасида мобил зенит ракетали комплекс (MANPADS) ушлаб турган ҳолати сурати пайдо бўлганига нисбатан шундай баёнот билан чиқиш қилган.

"Бу воқеа жуда жиддий қабул қилинмади. Лекин бундай ҳаракат такрорланиб, Туркия суверентитетига хавф солувчи ҳаракат дея баҳоланса, биз зарур чораларни кўришимизга тўғри келади", деган Калин.

У Туркия халқаро қонунчилик асосида шундай иш қилишга ҳақли эканини айтган.

"Яна бир бор такрорлайман, биз вазиятни чигаллаштирмоқчи эмасмиз. Лекин биз ўзимизга нисбатан ҳурматсизлик қилинишига жим қараб турмаймиз", деган у.

6 декабрь куни Туркиядаги бир қатор нашрларда суратга олинган «Цезар Куников» катта десант кемаси Босфор бўғозидан ўтаётганда унинг палубасида қўлида мобил зенит ракетали комплекс (MANPADS) ушлаб турган россиялик ҳарбийнинг сурати чоп этилганди.

Туркия Ташқи ишлар вазири Мевлут Чавушоғлу ушбу воқеани провокация дея баҳолаганди.

Шундан сўнг, Туркия ТИВ Россия элчисини чақиртириб, ушбу воқеа юзасидан норозилик билдирди.

Кўп ўтмасдан, Туркия Россия кемаларининг Босфордан ўтишини қийинлаштиргани ҳақида хабар берилди.

Ўз навбатида Россия ТИВ вакили Мария Захарова Россия ҳарбий кемалари Босфор орқали Монтрё конвенциясида қайд этилган тартибда ўтгшани ҳақида баёнот берган.