Ноябрь ойида Россияда сотилган янги автомобилларнинг 22,2 фоизи Жанубий Кореянинг Hyundai Motor и Kia Motors компаниялари ҳиссасига тўғри келди. Мазкур маълумотларни Европа бизнеси ассоциацияси Сеул шаҳрида тақдим этиб, ассоциация вакили қайд этилган кўрсаткични рекорд натижа деди.

Бозор улуши ортганига қарамасдан, ҳар икки компаниянинг ҳам Россияда сотган маҳсулотлари сони 2014 йилнинг шу даврига нисбатан камайган. Жумладан, Hyundai Motor савдоси 7 фоиз ёки 15,1 минг донага қадар пастлаган бўлса, Kia Motors`ники 32 фоиз - 14,1 мингтагача камайган.
Айни пайтда, мазкур кўрсаткичларни Россия бозорида фаолият кўрсатаётган бошқа компаниялар натижасига қараганда анча ижобий баҳолаш мумкин. 2015 йилда янги автомобиллар савдоси ҳажми 42,7 фоизга камайган бўлиб, ўтган 11 ой давомида жами бўлиб 131,6 минг дона автомобиль харидорини топган.

Эслатиб ўтамиз, 8 декабрь куни Россияда энг оммабоп бўлган автомобиль моделлари рўйхати эълон қилинган эди. Унга кўра, Россия автомобиль бозорида кетма-кет беш ойдирки Hyundai Solaris 11 минг 462 дона сотилиб пешқадамлик қилмоқда. Ундан кейинги ўринда Lada Granta (9000 та машина), учинчи ўриндса эса Kia Rio (8253 та автомобиль) билан бормоқда.

Сотилиши бўйича энг катта йўқотишни Mitsubishi (2002 машина, -74 фоиз) ва Chevrolet (3072 машина, -71 фоиз) компаниялари бошдан кечирган. Шу ўринда айтиб ўтиш жоизки, GM Uzbekistan автомобилларининг 2015 йилдан бери Россия бозоридаги сотуви кўрсаткичи 47 фоизга тушиб кетган.