Озарбайжон президенти Илҳом Алиев 2016 йил 1 январдан мамлакатда нақд пулга спиртли ичимликлар сотилиши тақиқланиши ҳақидаги фармонни имзолади, деб хабар бермоқда РИА “Новости” ахборот агентлиги. Ушбу қонунни бузганлик учун жиноий жавобгарлик ҳам қўлланиши мумкин.

“50 манатгача (50 доллар атрофида) нақд пулга акцизланадиган маҳсулотларни, тамаки маҳсулотларидан ташқари, сотиш ва бундай маҳсулотларни сотиш мақсадида нақд пулга сотиб олишга 100 манат миқдорида жарима солинади”, деб айтилмоқда маъмурий қоидабузарликлар кодексига киритилган ўзгартиришларда.

Озарбайжонда спиртли ичимликлар акцизланадиган маҳсулотлар ҳисобланади.

Шунингдек, шу муносабат билан жиноят кодексига ҳам тузатишлар киритилди. “Катта миқдордаги (50 дан 1000 манатгача) нақд пулга акцизланадиган маҳсулотларни, тамаки маҳсулотларидан ташқари, сотиш ҳамда уларни сотиш мақсадида нақд пулга сотиб олишга 1000-2000 манат миқдорида жарима солинади ёки бир йилгача ахлоқ-тузатиш ишлари ёки бир йилгача озодликдан маҳрум этиш билан жазоланади”, дейилмоқда тузатишларда.

Таъкидланишича, янги тузатишлар 2016 йил 1 январдан кучга киради.