7 декабрь куни Қирғизистон бош вазири Темир Сариев “Рақам белгиларини қайд этишнинг янги намуналарини тасдиқлаш тўғрисида”ги ҳукумат қарорини имзолади.

Ҳужжатга биноан, Қирғизистон Республикаси ҳукумати қошидаги Давлат қайд этиш хизмати  рақам белгиларини тайёрлаш бўйича масъул ташкилот ҳисобланади. Давлат рақамларининг алмаштирилишига эса сохта рақам белгиларининг учраши сабаб бўлган.

Рақам белгисига тушириладиган махсус шрифтдан фойдаланилгани янги турдаги рақамларнинг ўзига хос жиҳати ҳисобланади. Шрифт халқаро стандартлар ҳисобга олинган ҳолда ишлаб чиқилмоқда. Янгича белгиларда ҳарф ва рақамларни нотўғри талқин қилиш, уларни алмаштириб қўйиш имконияти камаяди. Шу боис мазкур шрифт “сохталаштиришни мураккаблаштирувчи” номини олди.

Рақам белгилари билан биргаликда, “Хавфсиз шаҳар”лойиҳасига ҳам тайёргарлик кўрилмоқда. Мазкур тизим автомобиллардаги давлат рақамида фойдаланилган янгича шрифтда ҳарф ва рақамлар тузилишида мураккабликлар мавжуд эмаслиги сабабли уларни осонроқ қайд этади.

Давлат қайд этиш хизмати жисмоний ва юридик шахсларга янги рақам белгиларини 2016 йилнинг 1 апрелидан тақдим этишни бошлайди.