Rolls-Royce серҳашам автомобилларини ишлаб чиқарувчи британ компанияси коктейлларни аралаштириш учун дизайнерлик тўпламини намойиш қилди. Luxurylaunches нашрининг хабар беришича, бу тўплам ҳам классик, ҳам замонавий ичимликларни тайёрлашда қўл келади.

Саватча кўринишидаги ушбу барменлик тўплами америка ёнғоғи ва табиий тери билан ишланган. Шу материаллардан Rolls-Royce автомобилларини безашда ишлатилади. Тўплам компания дизайнерлари ва Лондондаги Dorchester меҳмонхоналари экспертлари иштирокида яратилди. Саватчалар чекланган миқдорда ишлаб чиқарилди ва 46 минг долларлик нархда таклиф қилинмоқда. Тўпламга стаканлар, патнис, фильтрлар ва бошқа зарурий анжомлар киритилган.

Bentley маркаси ҳам ўзининг Bentley Bentayga деб номланган биринчи кроссовери ишлаб чиқарилишига пикниклар учун дизайнерлик тўпламлари яратди. Бу тўпламлар юкхонадаги махсус бўлинмага жойлаштирилиб, тортиб чиқарилиши мумкин. Улардан бирида бренд тасвири ўйиб туширилган шампан виноси учун бокаллар бор. Тўпламда, шунингдек, пикниклар учун кашемир матосидан ишланган гиламча ҳам мавжуд.